Вермас-ӧ лоны сэтшӧмыс, мый коми ныв 20 гӧгӧр во оліс коми сиктын и ньӧтчӧдысь эз коми паськӧмасьлы? Вермас! Тайӧ ме. 👀
Эськӧ дзолясянь нин тшӧкыда петкӧдчи сцена вылын, но мыйлакӧ некор эг сарапанасьлы. Ӧні сьӧкыд шуны, кыдз татшӧмыс лои. Гашкӧ, тадзи артмис сы вӧсна, мый ме быдми эг ичӧт туша тэчасаӧн да мен лӧсялана паськӧмыс эз сюр (ас арлыда челядь паськӧмыс меным вӧлі ичӧт, а верстьӧ йӧз паськӧмын воши)... Гашкӧ, кутшӧмкӧ мӧд помка вӧлі. Ог тӧд.
Ой, такӧд тшӧтш тӧд вылӧ уси со кутшӧм лоӧмтор. Ичӧтдырсянь менам эз сӧмын туша тэчасӧй ыджыд вӧв, мукӧд одноклассникъяссьым юрӧ на ыджыдджык вӧлі. И вот февраль 23-ӧд лун кежлӧ школаын нуӧдісны сідз шусяна "Смотр строя и песни" и быдӧнлы юрӧ быть колӧ вӧлі сюйны фуражка. Ме некымынӧс видлі пасьтавны - ньӧти эз тӧр! 🙊 Сэсся ковмис фуражкасӧ абу пасьтавны, а сӧмын пуктыны юр вылӧ да сідз и маршируйтны. Индияын нывъяс юр вылын дозъяс новлӧдлӧны, мукӧдъяс мыш веськӧдан могысь небӧгъяс новлӧдлӧны, а ме вот - фуражка. Восьлалігӧн, помнита, думайтчи сӧмын сы йылысь, мед нинӧм юр вывсьым оз усь - йӧз серамыс лоӧ.
Но ме тайӧ ылыстчи темаысь.
Первойысь коми паськӧмаси карын велӧдчигӧн нин, кор дасьтыси конференция кежлӧ. Та йылысь и кӧсйи гижыштны.
Весьтас кӧ шуны, сарапан пасьталӧм бӧрын лолӧй эз кыпты, киясӧй эз тіравны, пӧль-пӧчьяслӧн сьӧда-еджыда фотояс тӧд вылӧ эз усьны. А ме збыльысь чайті, мый тайӧ лоӧ тадзи!
Ылӧдчытӧг висьтала, тайӧ здукъясас ёна жугыльмылі сыысь, мый ме сьӧлӧмӧн эг куж кывны нэмӧвӧйся традицияяс, а кылі сӧмын паськӧмыслысь сьӧктасӧ да кызтасӧ.
Но кутшӧмкӧ кад мысти ас йылысь гӧгӧрвои со мый: коми паськӧмӧн менам оз артмы мышкырасьны... Ичӧтдырсянь на гӧрбыльтчысь мышкӧй другысь ачыс кутіс веськавны! Дивӧыд и эм! Такӧд тшӧтш ме вӧчи мӧд открыттьӧ: сарапан новлігад менам ньӧтиысь эз матькыштчыл (вайӧ ог-ӧ кутӧ пӧръясьны, мый нывъяс дзик оз матькывлыны! Быдсямаыс жӧ овлӧ.).
Ог тӧд... Кӧлӧкӧ, татшӧм мӧвпыс менам абу выль, но тайӧ ставсӧ гӧгӧрвоӧм бӧрын - весиг чуймӧмла измылі недыр кежлӧ ӧти инын.
P.S.: А сэсся конференция помасьӧм бӧрын нин думышті: "Гашкӧ, меын абу на ставыс вошӧма, кӧть киясӧй эз тіравны и сьӧда-еджыда фотояс юрам эз локны".
