Со и локтіс стенӧ выль календар ляскӧдан кад.
Выль во кежлӧ некор ог дасьты план, мунысь волы ог вӧчлы
кывкӧртӧдъяс. Ме вообще абу планъяс серти олысь морт: тӧда, мый олӧмын век
мыйкӧ лоӧ планысь вывті, а мыйкӧ эськӧ и кыссяс воысь воӧ ӧти плансянь мӧдӧ.
Колян во йылысь кутшӧмсюрӧ мӧвпъяс воӧны сӧмын ӧні, блог
гижны пуксьӧм бӧрын нин.
Дерт, тайӧ воын
вӧліны и нелючкиторъяс, мый йылысь абу окота гижны татшӧм чудӧ руа кадӧ. Бурторйыс
унджык жӧ вӧлі!
2017-ӧд во озырмӧдіс
менсьым мупасӧс каръясӧн, кытчӧ ме сюрлі: вермалі Йошкар-Олаын войтыркостса
конференцияын, гожӧмын Саранск карын велӧдышті фин кыв, Глазовса студентъяӧс 15
минут чӧж велӧді коми кывйӧ, йӧрмылі Кировын, Вежа Петыркарын видзӧді йи вылын
исласьӧм… Колян нин вонас Изьваса “Хоровод невестын” босьті коймӧд тшупӧда
диплом да сыкӧд тшӧтш вурсян машина (да, меын топыда овмӧдчӧма еврей руыс 👀).
Нуӧді коми мафия (медводз Сыктывкарын, а сэсся и Мордовия юркарын фин кывйӧн)…
Ой, менам кутшӧмкӧ
ошйысьӧм артмӧ 😞 (ог эськӧ радейт татшӧмсӧ
да).
Таысь кындзи позьӧ висьтавны и куим медшӧртор йылысь, мый ме
гӧгӧрвои 2017-ӧд воын:
1.
Олӧмын век эм йӧз, коді пырысь-пыр дасьӧсь
нюжӧдны мен и ки, и кок, и пирожнӧй кӧрӧб.
2.
Вӧлӧмкӧ, зэв унаӧн майшасьӧны менам аскиа лун
понда. А петкӧдчӧ тайӧ со кыдзи. Тайӧ вонас ме мудзи нин вочавидзны кык юалӧм
вылӧ: уна-ӧ мен коли велӧдчыны и мый ме кута вӧчны университетсӧ эштӧдӧм
бӧрын. Та йылысь юасисны весиг тӧдтӧм йӧз (менӧ тай кытыськӧ тӧдӧны а)! Мукӧддырйи
окота вӧлі паськӧмам гижны: «1. Бӧръя
во. 2. Ог тӧд». Кодъяскӧ, гашкӧ, и дӧзмисны татшӧм “кӧдзыд” вочавидзӧмъяссьыс…
Но ме и збыль нинӧм на ог тӧд аслам водзӧ вылӧ олӧм йылысь.
Чайта, май тӧлысьын
менам лоӧ уна узьтӧм вой, кор дзормытӧдз кута мӧвпавны, кытчӧ эськӧ сибӧдчыны. А
ӧні – нинӧм на ог тӧд (вот тані менам плантӧм олӧмӧ и петкӧдчӧ 😬).
3.
Меным ёна колӧ контролируйтны ассьым чужӧмӧс. Вӧлӧмкӧ,
олӧмын чужӧм вылын менам зэв тшӧкыда артмӧ мисьтӧм тӧдчӧм. Йӧзыс тшӧкыда чайтӧны, мый ме
мыйыськӧ найӧс мустӧмта, либӧ ачым ёна тшапитча, мый мен мыйкӧ зээээв оз
кажитчы… Ме жӧ тайӧ кадӧ верма мӧвпъясӧн лэбавны ылі муясті и не казявны ассьым
скӧр чужӧмӧс. Колӧ, гашкӧ, сьӧрын новлӧдлыны гижӧд «ме абу скӧр – чужӧмӧ татшӧм».
Тешкодь, мый велӧдчигӧн ме
медъёна волыся век жугыль чужӧма нывкакӧд. Ог тӧд, овлӧ-ӧ сылӧн олӧмын лун, кор
эськӧ эз юавны, мыйла сійӧ сідз шогасьӧ. Колӧкӧ, тешкодя ми, медся скӧрыс да
медся жугыльыс, ӧттшӧтш ветлавлам. Лена коркӧ
висьтавліс, мый боксянь ми быттьӧ пленӧ босьтысь да пленӧ босьтӧма 👭. Выль
вонас, гашкӧ, ковмас «абу скӧр» да «абу жугыль» гижӧдъяссӧ дасьтыны.
Со татшӧм кывкӧртӧдъяс артмисны
менам колян во серти. Ёнджыкасӧ ошйысьӧм жӧ лои да 🙈.
____________
2018-ӧд воын сиа ставӧнлы не сӧмын аддзыны выль шуд, но и
кужны видзны важсӧ. 💫
