Унаысь ёртъяссянь кывлi вӧзйӧм заводитны нуӧдны ассьым блог. Дыркодь эг кутчысь татшӧмторъяс, сы вӧсна, мый, менам чайтӧм серти, (бур вылӧ ли лёк вылӧ) олӧмӧй абу ёна озыр лоӧмторъясӧн...сідзкӧ и гижны лоӧ нинӧм йылысь.
Но тавой (а войясын менам тшӧкыда чужӧны татшӧм сяма мӧвпъяс) видлі заводитны. Видзӧдлам, мый сэсся таысь лоӧ.
Менам блогйын медводз йӧзӧдӧм лоӧ ӧні ёся сулалысь тема вылӧ - коми кыв велӧдӧм йылысь. Кыдз и унджык комиыс, ме чайта, мый Коми муын олысьяслы быть колӧ велӧдны кывсӧ. Мукӧд кывъя войтырлы велӧдны абу пыдіа грамматикаӧ мунӧмӧн, а "кошка-кань, ложка-пань" тшупӧд вылын.
Но став тайӧ сёрнияс костас менӧ медъёна дивитӧ со мый. Некымын во сайын нин казялі татшӧм феномен: мукӧд коми бать-мамлӧн чужӧны роч челядь. Потансянь на кага заводитӧ тӧдмавны мирсӧ, олӧмсӧ ас чужан муыскӧд йитӧдтӧг.
А некымын лун сайын менӧ ыджыд дивӧ босьтіс татшӧмторйысь: нималана коми гижысь рочасис аслас челядькӧд, весиг комисянь вуджӧдіс роч вылӧ. Сідзкӧ артмӧ, мый нывкаыс оз гӧгӧрво коми сёрнилысь бытӧвӧй тшупӧдсӧ.
Ми уна сёрнитам сы йылысь, мед роч бать-мамлӧн челядь велӧдасны миянлысь канму кыв. А асланым кага оз гӧгӧрво мамыслысь чужан кывсӧ.
Такӧд йитӧдын тӧд вылӧ уси менам челядьдырся лоӧмтор. Миян классӧ локтіс велӧдчыны роч регионысь зонка. Сылӧн семьялӧн вӧлі позянлун эновтчыны коми кыв велӧдӧмысь, но зонкаыслӧн пӧчыс шуис татшӧм кывъяс: "пусть учит, голова ведь не отвалится". Тайӧ кывъясыс ёна мӧрччисны менам вежӧрӧ. Ӧні на, университетын нин велӧдчигӧн, кор, менам чайтӧм серти, плананым пуктӧны велӧдны сэтшӧм дисциплинаяс, кодъяс дзикӧдз оз йитчыны миян нырвизьӧн, ме лӧньӧда ачымӧс "голова ведь не отвалится" кывъясӧн.
Ме зэв уна мый тайӧ олӧмас ог гӧгӧрво. Но коми бать-мамлысь роч челядь чужтӧмсӧ ме гӧгӧрвоны весиг ог и кӧсйы.
Ог тӧд, мый водзӧ лоӧ олӧмам, но коркӧ аслам кагакӧд сёрнитігӧн кӧ чужан кывйысь менам вылӧджык пуктыссяс кутшӧмкӧ мӧд кыв, сэки ковмас тэрыба котӧртны мамӧй дорӧ, ас киӧн сетны сылы ремень да корны, кыдз тай ӧні шуӧны, патриотӧс сӧвмӧдан урок 😃.
P.S.:. Эска, мый татшӧмӧдзыс оз жӧ лок.
