Бӧръя лун 10-сӧ менам олӧмысь позьӧ нимтыны Пушкин кывъясӧн –
«Пир во время чумы». Студентъяслӧн велӧдчан семестр пом, лунысь-лун гижалӧны
зачетъяс, контрольнӧй уджъяс, а мукӧдъяс – весиг и экзаменъяс. Ме жӧ тайӧ каднас ысварті Вежа
Петыркарӧ (прӧст кылӧн кӧ висьтавны - Питерӧ).
Весьтас кӧ шуны, лунся Петыркарыс эз вӧв ёна мичаӧн: лым пыдди няйт, шонді эз и тыдовтчыл, ставыс вӧлі руд рӧма. Но лунся рудлунсӧ вештісны рытся Выльвося югыд биясыс.
А мунсис менам сэтчӧ сы восна, мый тайӧ лунъясас Петыркарын
вермасисны медвына Россияса фигуристъяс. Эн думыштӧй, мый ме тшӧтш накӧд
вермаси! Кор ачым коньки вылын сулала, юрын сӧмын ӧти мӧвп бергалӧ, мый, коді чужлӧма уявны, и збыль, некор оз лэбзьы.
Питерӧдз ме муні, мед видзӧдны тайӧ
вермасьӧмъяссӧ.
Мунтӧдзыс на чайті, мый абу телевизор пыр видзӧдны лоӧ
сьӧкыд – йи аренаыс ичӧт, фигуристыс йи вылас 1 либӧ 2, а видзӧдысьыс уна. Мый вӧлі
збыльвылас сьӧкыд висьтавны пара кывйӧн.. Ставыс тыдаліс зэв бура (менам на йи
дорын матын местаясӧ вӧліны); стадионыс тайӧ некымын чассӧ оліс ӧти ӧдын: кор
кодкӧ усяс – ставӧн вӧлі ыджыда лолыштам... А кекӧначасим кыдз! Думайті, мый ки
мускулъясӧ дзикӧдз топаласны (эз жӧ тай а).
А вообще, арена вылын первой каднас ме гӧгӧрвои,
мый мыйкӧ абу тадз, мыйкӧ мен оз тырмы. Сёрӧнджык нин дӧвгис, мый ме абу велалӧма
видзӧдны татшӧмторъяссӧ телевизорын комментаторъяслӧн сёрнитӧг. Но тайӧ кылӧмыс
сэсся ӧдйӧ муніс: мортыд ӧд ставыс дорӧ велалӧ.
Первой лунсӧ ме пукалі жеръялӧмӧн. Став 52 пиньӧй югъялісны!
Кор петны йӧктыны дасьтысисны Женя Тарасова да Вова Морозов (кодъяс сёрӧнджык и
лоины вермысьясӧн), менам, буракӧ, югъялісны нин став 60 гӧгӧр пиньӧ. Дасьтысигас
фигуристъясыс сулалісны миян сектор дорӧ чужӧмӧн. И со… Женя синъяснас ӧдйӧ
нуӧдіс видзӧдысьясті, вӧлі аддзӧма, буракӧ, менсьым пиньясӧс, да синъяссӧ бӧр
вайӧдіс ме дорӧдз – гашкӧ, чайтіс, мый кодкӧ сылӧн тӧдса сідз жеръялӧ. Зэв сюся
видзӧдіс ме вылӧ, гӧгӧрвоис, мый тайӧ тӧдтӧм морт, да муніс йӧктыны. Женялӧн ме
вылӧ видзӧдлӧм бӧрын, менам кутісны югъявны 70-ысь нин унджык пинь. Медводз юӧрыс тайӧ
луннас, кодӧн ме юкси ёртъяскӧд, вӧлі сы йылысь, кыдз ми Женя Тарасовакӧд
видзӧдчим синмысь синмӧ.
Тайӧ жӧ каднас ислалӧмсӧ телевизорті видзӧдӧмаӧсь и гортын. Мам
сераліс, кыдз ичӧт чой видыштӧма сійӧс фигуристъясӧс видзӧдӧмысь: «Тэ мыля
фигуристъяссэ видзедан? Тэ йӧзсэ видзед! Друг Ираэс сэтэн петкедласны».
А Иралӧн чужӧмыс, колӧ шуны, и збыль некымынысь петкӧдчыліс
телевизорті. Ме пукалі камераяслы дзик паныд, да операторъяс менӧ некымынысь «кыйыштлісны».
Фигурнӧй катание видзӧдан здукъясас став мир пасьталаыс
ӧдвакӧ кодкӧ меысь шудаджыкыс вӧлі! Шулывлӧны тай, мый эм пӧ сэтшӧм ас кылӧм,
кор сьӧлӧмтӧ быттьӧ жугӧдасны уна тор вылӧ, а сэсся бӧр чукӧртасны. Вот мекӧд тайӧ
и вӧлі.
Бӧръя тӧлысьсӧ нин олі тайӧ мунӧмсӧ виччысьӧмӧн. Поездын на
быттьӧ босьтіс пытшкӧсса тіралӧм, да сэні, кыдз и пыр, эз и унмовссьыл войнас. И
со… ӧні ставыс нин бӧрын.
Век на син водзын сулалӧ серпас, кыдз ме муні Питерӧ
ныргоралысь вагонын. Сэки чайтсис, мый поездас тайӧ каднас эг узьӧ сӧмын кыкӧн –
ме да машинистыс.
Буракӧ, тайӧ виччысьӧм руыс та войнас меын чужтіс кывбуртор, некымын
строчка:
Кор жугыль вевттяс тэнсьыд сьӧлӧм -
Эскы!
Кор шудыд дзебсяс ылі муын -
Виччысь!
Кор кылан пытшкӧс билысь кусӧм -
Ловзьы!
Сьӧд да еджыдкостса тышын вермы
Ачыд!
Югыд луныс тэнад туйын
Лоас!
Кусӧм сьӧлӧм морӧс пытшкын
Ловзяс!
Мича мойдыд тӧвся войын
Збыльмас!
Ыджыд шудыд парма пиысь
Аддзас!
Тэ сӧмын сьӧкыд здукас
Эскы асад.
