Тулыслысь бӧръя вежонсӧ таво коллялі
Йошкар-Олаын. Мари му юркарын муніс «Мисс
студенчества Финно-Угрии 2018» конкурс. Эг жӧ конкурсантка пыдди татчӧ пырӧдчы
а, СГУ-сянь делегацияын вӧлі. Тайӧ карас
сюрӧдчи мӧдысь нин. Колян во тайӧ жӧ каднас ветлі сэтчӧ «Богатство финно-угорских
народов» форум вылӧ (тайӧ форумыс таво тшӧтш жӧ сэн вӧлі).
Кыкысь волӧм бӧрын век на ог вермы
гӧгӧрвоны ассьым видзӧдлассӧ тайӧ кар вылас. Ӧти-кӧ, карыс зэв мича, эм кӧн
ёртъяскӧд гуляйтны, кытчӧ петавлыны. Тан ми ёна радейтім бульварті набережнӧйӧдз
лэччыны. Но, думыштлыны кӧ, ме ог ёна гӧгӧрво смыслсӧ тайӧ стрӧйбаясыслысь. (Век
жӧ мен быдлаысь смысл колӧ корсьны😒). Мӧвпыс эськӧ абу лёк – мед быд морт, сылӧн
эмлун вылӧ видзӧдтӧг, вермис мукӧд каръяс, мукӧд муяс «аддзылны». Та могысь
сэн тэчӧны стрӧйба-копияяс Москва, Петыркар,
Казань, Голландия, Франция… видлӧгъяс серти. Но тайӧ копияяссӧ, гӧгӧрвотӧм
памятникъяссӧ тэчӧмнас, оз-ӧ карыс ассьыс чужӧмсӧ вошты? Аслас чужӧмыс сылӧн
быттьӧ и абу, сӧмын копия. Да и, кыдз шуӧны асьныс олысьясыс, татшӧм стрӧйбаяс
бӧрсяыс колӧ торъя дӧзьӧритӧм, и татшӧм дӧзьӧритӧмыс тан оз тырмы – мукӧдлаын нин
кирпичыс едждӧ, кытікӧ киссялӧ… А тэчасыслы сӧмын 2-5 во на. А мый 10, 20 во
мысти лоӧ?
Но бергӧдчам конкурс дорӧ.
Медводзсӧ Сыктывкарсянь
«Мисс студенчества Финно-Угрии 2018» вылӧ мӧдӧдчим кыкӧн, кык Ирина Терентьева. Менӧ на Ираыд вӧлі делегация веськӧдлысьӧн индӧма. Нывъяс сэсся и сералісны, Ирина Терентьева Ирина Терентьевалӧн пӧ юрнуӧдысь. Конкурс котыртысьяс дивуйтчӧмаӧсь жӧ, мый локтӧ татшӧм «ыджыд» делегация да ӧткодь
нимаӧсь на. Миян лыдлы дивуйтчисны и Сыктывкарын, кыдз пӧ тадз смелмӧдчинныд
кыкӧн мунны. "Ыджыд" лыдлӧн помкаыс вӧлі некымын. Ӧти-кӧ, ӧні студентъяслӧн пӧсь кад: кодлӧн
сессия матысмӧ, код «бӧжъяс» чышкалӧ. Мӧд-кӧ, тан и сьӧмъя мытшӧд вӧлі: ог куж шуны
колян вояс серти, но таво эз ичӧтӧн вӧв котыртан мынтысьӧмыс (орг. взносыс). Мӧд
делегацияяс вермисны локны унджыкӧн сы вӧсна, мый велӧдчанінныс налы водзвыв
ставсӧ мынтӧма, ньӧбӧма билетъяс… Позьӧ шуны, найӧ воисны став дась вылас. Миян
жӧ делаыс мӧдарӧ: медводз студентъяслы аслыныс колӧ судзӧдны сьӧм, венны став
сьӧмъя мытшӧдсӧ, и сэсся локтӧм бӧрын, кутам лача, велӧдчанін вештас тайӧ рӧскодсӧ. Медсясӧ
та вӧсна и мунім кыкӧн. Тырвыйӧ командасӧ чукӧртім нин Йошкар-Олаын. Миянкӧд сцена
вылын тшӧтш петкӧдчыны сӧгласитчис мари зон, сэсся конкурс лунӧ нин, лун джын
кежлӧ Сыктывкарсянь воліс миян колипным, Саша Ногиева. Конкурс вӧлі некымын
тшупӧда: интеллектуальнӧй конкурс, костюм чужӧм петкӧдлӧм, творчествоа
петкӧдчӧм да некымын дефиле (подиумті мичаа ветлалӧм). Колӧ шуны, мый конкурс
кежлӧ дасьтысигас, ми кылім отсӧгсӧ уна-уна мортлысь: и номеръяс дасьтӧмын, и
кӧлуй корсьӧмын (а кӧлуйыс вель уна коліс!)…Отсалісны весиг найӧ, кодсянь тайӧс
он вӧлі и виччысь.
Чайта да, абу бур сійӧ, мый тайӧ
конкурсын абу быть колана чужан кыв тӧдӧм. Шуам, тырмана велӧдчыны финн-йӧгра
регионса вылыс тшупӧда велӧдчанінын да кужны сьывны тайӧ регион кывнас либӧ
национальнӧя йӧктыны. Пресс-конференция вылын вӧлі юалӧм та помлась, да миян
Ирина шуис, мый сійӧ зэв стрӧга видзӧдӧ та выла и сы серти кӧ, татшӧм
конкурсъяс вылӧ колӧ локны сӧмын кывсӧ тӧдысьяслы. Такӧд йитӧдын ми думыштім
сцена вылын став номерын петкӧдчыны сӧмын чужан кывйӧн, дерт жӧ, экран вылӧ роч
вуджӧдӧмсӧ петкӧдӧмӧн.
Конкурс кывкӧртӧдӧн лои Иралӧн «Мисс
артистизм» ним босьтӧм. Мый сэсся кӧсъян, кор командалӧн 75%-ыс – КВН-ын
ворсысьяс.
Бурторйӧн чайта сійӧ, мый локтан восянь конкурслӧн бырӧ, сідз шусяна, Евровидение принцип. Тайӧ вояс чӧж вӧлі сідз, мый вермысь ныв локтан во кежлӧ вайӧ конкурссӧ аслас велӧдчанінӧ, ӧні регионъяс "Мисс студенчества"-сӧ пондасны нуӧдны ӧчӧредьӧн. Думайта да, тайӧ принциптӧг лоӧ честнӧджык. Ӧти-кӧ, тайӧ сетас позянлун паськӧдны конкурслысь географиясӧ (кӧнкӧ конкурсыс эз нин ӧтчыдысь мун, а кутшӧмкӧ регионъясӧдз эз на и волы). Мӧд-кӧ, (гашкӧ, татшӧмсӧ оз позь висьтавны, но ме висьтала), тайӧ ӧткодялас став нылыслысь шансъяссӧ. Сы вӧсна мый, тайӧ конкурсыс котыртӧм боксянь зэв ыджыд, сьӧкыд, ӧдвакӧ позьӧ вӧлі надейтчыны сы вылӧ, мый торъя велӧдчанінлы сетасны, шуам, кык во чӧж нуӧдны тайӧ конкурссӧ... да и ӧдвакӧ кодкӧ кӧсйис татшӧмас босьтчыны. Сійӧн, весьтас кӧ шуны, ог тӧд, кутшӧмӧн коліс лоны, мый коліс вӧчны сцена вылын велӧдчанін-организаторсянь петкӧдчысь нывкаыслы, мед сылы сетасны "Мисс студенчества Финно-Угрии" ним.
Кута лача, мый воысь воӧ конкурсыс кутас крепмыны и бурмыны, да козьналас финн-йӧгра мирыслы оз на ӧти "Мисс"-ӧс.
А тайӧ вӧлі миян бӧръя позянлунӧн пырӧдчыны конкурсас, ӧд регыд нин помасяс миянлӧн студенталӧм кад (весиг сьӧлӧмам бытшкыштіс татшӧм кывъяс бӧрас💔). Тайӧс позянлунсӧ и пӧртім олӧмӧ. Чайта да, артмис!
