Тшӧкыда-ӧ тіян будильник овлӧ пуктӧма 3 час вой кежлӧ?
Менам бӧръя кадӧ тшӧкыда – Олимпиада ӧд заводитчис.
Корея кад серти ставсӧ колӧ удитны видзӧдны, ставыс
помлась «висьыштны».
Весьтас кӧ шуны, блогйысьны Олимпиада йылысь сэсся
эг нин кӧсйы: пара тӧлысь сайын нин ставсӧ гижлі. Но ёртъяскӧд талунъя сёрни
бара и ышӧдіс гижны некымын кыв.
МОК-лӧн тшӧктӧм серти Россияысь вермасьысьяс сюрины
Олимпиада вылӧ стрӧга урчитӧм критерийяс кузя: дӧрапастӧг да кыптӧг, «Россия»
ним шуны позьтӧг… Таысь кындзи эз лэдзны ворсны найӧс, кодъяслӧн водзджык
вӧліны допинга мытшӧдъяс, либӧ найӧс, кодъяс кодлыкӧ эз кажитчыны. Тадз, ӧти вӧчӧмторсьыс мӧдысь нин накажитісны
Воркутаын чужлӧм Павел Кулижниковӧс, код некымын вежон сайын босьтіс медальяс конькиӧн ислалӧмын Европаса чемпионат вылын. Помка висьтавтӧг эз лэдзны и конькиӧн мукӧд вына ислалысьясӧс,
лыжникъясӧс, биатлонын эстафетаяс вылӧ весиг йӧзыс оз чукӧрмы…списокыс кузь.
Кор Ӧтуввезын
ли, тӧдсаяс костын ли кыла вензьӧмъяс Олимпиада бойкотируйтӧм йылысь, юрӧ век локтӧ
тайӧ серпасыс, код и менам олӧмлы тшӧкыда лӧсялӧ…
 |
| серпасыс Ӧтуввезысь |
А вообще, чайта, быд лоӧмторйысь колӧ шедӧдны мыйкӧ бурӧс. Шуам, мый эськӧ бурыс тайӧ ситуацияын? Гашкӧ, сійӧ, мый ӧні миян том вермасьысьяслӧн эм позянлун босьтны Олимпиадаса опыт. Со, талун некодлы тӧдтӧм томиник Денис Спицов лыжиӧн 30 километра чӧж став Норвегиясӧ кутіс напряжениеын: помӧдз вермасис медаль вӧсна… Но неуна эз тырмы – лои нёльӧдын. Мӧд ногӧн кӧ ставыс вӧлі – ыджыд юалӧм на вермис-ӧ сюрны эськӧ сійӧ тайӧ гонкаас… Да вообще, вермис-ӧ эськӧ Кореяас локны, унджыкӧс кӧ лэдзисны.
А кодлӧн нимыс оз югзьы таво Кореяын, налы, гашкӧ,
мойвиас нёль во мысти Пекинын, кӧні лоасны ӧтчыд Ворсӧмаӧсь нин.
Ог тӧд кыдз мукӧдъяслӧн, но орччӧдны кӧ мӧд
Олимпиадаяс видзӧдӧмӧн, сьӧлӧм тайӧ йӧзыс помлась, кодъяс дӧрапастӧг вермасьӧны
дӧрапас вӧсна, висьӧ ёнджыка.
