четверг, 25 января 2018 г.

Ёртасьны "акулаяскӧд"

Студент лунӧ окота лои мыйкӧ гижны студенталӧм йылысь (кӧть бакалавр нимӧдз во джын велӧдчӧм да диплом гижӧм на). Водзджык жӧ эськӧ ностальгия кылӧмъясыс заводитчисны да. Мый сэсся...

Помнита университетса 1-ой сентябрӧс.
Пыртісны миянлысь группасӧ ӧти аудиторияӧ да заводитісны висьтавлыны студент олӧм йылысь. Кыдз жӧ ме полі! Сэки чайтсис, мый ме некор ог кут сёрнитны… аслам группакӧд (кутшӧмкӧ ёртасьӧм йылысь и мӧвп джынйыс эз вӧв). Найӧ ставныс меным вывті тӧлкаясӧн кажитчисны, кодъяс зэв вылӧ лэптӧны ныр да тшапитчӧны. «Акулаяс» - думыштсис сэки.

Код эськӧ вермис шуны, мый регыд тайӧ йӧзыс (торъя нин ӧтуволанінсаяс) лоасны мен татшӧм мусаясӧн да донаясӧн? А найӧ лоины. Натӧг тайӧ воясыс эськӧ вӧліны уна гажтӧмджыкӧсь да тыртӧмджыкӧсь.

Кор думышта аслам группа йылысь, первойӧн локтӧ юрам, мый ӧти группаӧ веськалім кык Ирина Терентьева. Та вӧсна медводз курссянь нин велӧдысьяс нимтісны миянӧс Ирина Андреевнаӧн да Ирина Гавриловнаӧн. Вообше, медтшӧкыда паныдасьысь нимыс миян группаын – Ирина (первой курс вылын вӧлім витӧн, ӧні – нёльӧнӧсь).

Ой, тӧд вылӧ уси, кыдз ме первойысь сёрми занятие вылӧ. Помкаыс вӧлі пыдди пуктанаӧн – … ме ылалі карас 🙈. Тайӧ вӧлі первой велӧдчан лунъясӧ, карсӧ бура эг тӧд, а тӧдсалӧн тӧдсаыс шуис, мый аддзӧма пӧ зэв дженьыд туй велӧдчанінӧдз да позьӧ 5 минутӧн сэтчӧдз мунны. Мунім йӧръясӧн да сэні и ылалім. Вӧлӧмкӧ, кытшъясӧн ветлалӧмась миян ичӧт велӧдчан корпус гӧгӧрыс. Тадзи 5 минутыс вуджис час джынйӧ.

Ешшӧ на лоӧмтор юрӧ воис (менам кутшӧмкӧ Казьтылан вой талун артмӧ, быттьӧ уна во сайын нин университетсӧ помавлӧма). Мӧд курсын велӧдчигӧн миянлы пуктісны содтӧд занятие субӧтаӧ медводз параӧн. Ми локтім, а велӧдысьлӧн вунсьӧма та йылысь. Воис мӧвп: аудитория ӧдзӧс дорын вӧчны зэв жугыль чужӧмъяса ачпас да ыстыны велӧдысьлы. Гижим на, мый коньӧр челядь локтісны субӧтаӧ первой пара вылӧ. Сійӧ ачыс вӧлі шмонитысь да шмоньсӧ гӧгӧрвоысь да эз и дӧзмы миян вылӧ татшӧм ачпасасьӧмсьыс. Скӧрджык велӧдысьлы эськӧ эг и лысьтӧй татшӧмторсӧ ыстыны.

Школаын на велӧдчигӧн кывлі, мый экзаменӧдз бӧръя войнас студент вермӧ велӧдны сійӧс, мый во чӧжнас юрас эз пыр. Некор эг эскы! Чайті: «Кыдз тадз?! Бӧръя войнас?! ЕГЭ кежлӧ тай витӧд классянь нин дасьтысям!». Ӧні эска…
 Паныдасьлісны эськӧ велӧдчысьяс, кодъяс дасьтысьӧны уна лунӧн, но ме ёнасӧ абу на лыдын. Медбура тӧдӧмлунъясыс юрӧ пырӧны медбӧр войӧ (таӧдз лунъясӧ заводитлан дасьтысьны, но срочнӧ ковмас тшай юны, кытчӧкӧ мунны, сёян дасьтыны, вузасянінӧ ветлыны, кыны, вурны, юрси тшӧтшкӧртны…и сідз водзӧ список кузя. Юртӧ гыжйыштны некор – сессия ӧд!).

А артмас кӧ водзвыв дасьтысьыштны – шӧр нагрузкаыс век жӧ бӧръя вой вылӧ сюрӧ. Коркӧ вӧлі сідз, мый экзамен заводитчытӧдз 12 час водз ме тӧдмалі: вӧлӧмкӧ, ог колана ӧшмӧс серти дасьтысь. Ковмис выльысь ставсӧ заводитны.

Сессия дырйи менам сьӧкыдлуныс на сыын, мый киӧй абу ёна «кокни». Ветымын юалӧмсьыс кӧ витсӧ слабджыка тӧда – теория вероятностилы паныд веськалас мыйкӧ тайӧ витсьыс. Гежӧда кокни сюрлас. Неважӧн на экзамен водзын нывъяслы шуи, мый ме ӧні сы мында тӧда, но веськалас ӧд сэтшӧм юалӧм, кодӧс эг гӧгӧрво.

Гашкӧ, и збыль, делӧыс сыын, мый экзамен вылын билетсӧ кыскытӧдз ме юрам медсьӧкыдсӧ кыски нин. Ог тӧд. Эг и велав тайӧ вояснас позитивнӧя мӧвпавны сессия дырйи.
Узьтӧм вой бӧрын виччам экзамен вылӧ пыран кад
Тайӧ куим да джын велӧдчан вонас мыйыс эськӧ эз и вӧвлы. Мый кажитчис дзонь трагедияӧн, ӧні и мӧвпъясӧ оз волы. Мыйкӧ йылысь и ӧні на яндзим думыштны. Но, дерт жӧ, став лоӧмтор вылас ӧні ёнджыкасӧ видзӧдсьӧ нюм пыр .


Татьянаяс лунӧ студенталысьяслы сиа югыда коллявны велӧдчан кадсӧ, а налы, кодлӧн тайӧ кадыс мыш сайын нин – шоныд нюмӧн казьтывлыны велӧдчан лунъяссӧ

Гарри Поттер, йӧв да зорӧд

  Февраль тöлысь. Салехардысь Ира Гавриловна юасьö онлайн-звонокöн: - Привет! Мыйнэ каран? - Гарри Поттерэс тай лыддя. И тэн привет. - И куд...