Тшайлӧн коланлун

Кыдз унаӧн тӧдӧны, таво Сыктывкар босьтчис нуӧдны лызьӧн ордйӧдчӧм кузя став Россияса чемпионат (но кӧть Питерӧдз бара мунны оз ков 😃), коді и заводитчис кык лун сайын. А абу тӧдны та йылысь, чайта да, оз позь, сы вӧсна мый карын быдлаын ӧшалӧны афишаяс, та йылысь гижӧны да петкӧдлӧны став республикаса СМИ-ыс.

Вермасьӧмъясыс лоӧны на локтан вежон чӧжыс, сійӧн кӧсъя гижны болельщикъяслы мыйкӧ инструкция сямаӧс. Опытнӧй “висьысьяс”, гашкӧ, нюмъёвтасны тайӧс лыддигӧн, а налы, кодъяс окотитӧны медводдзаысь на ветлыны стадион вылӧ, менам гижӧдыс лоас пӧлезнӧйӧн.

фотоыс В. Муравьевалӧн

Первой, мый йылысь, кӧсъя шуны – шоныда пасьтасьӧй! Тайӧ истинасӧ ми быттьӧкӧ челядьдырсянь ставӧн тӧдам… Но дивӧыс менам вӧлі, кор талун стадион вылысь аддзи бӧръя мода серти пуджӧм гача куш кок шегъя ныв-зонйӧс. Найӧс аддзылӧм бӧрын весиг пиньясӧй кутісны ӧта-мӧданыс татшкӧдчыны. 
Шоныда пасьтасьӧй да кӧмасьӧй, кӧть ывла вылын и кӧдзыдыс абу уна градус: ӧти-кӧ, стадионыс сулалӧ кушинын да тӧвъяс сэні котралӧны дугдывтӧг, мӧд-кӧ, тувсов тӧлыс босьтӧ лыясӧдзыд (Изьваын эськӧ шуасны «тӧлыс зэй йир»), а коймӧд-кӧ, лун чӧжсӧ ті кутанныд ветлӧдлыны ывлаті кӧдзыд лымті.

Эм кӧ позянлун босьтны аскӧд термосын тшай, копе – быть жӧ босьтӧй шонӧдчан могысь! Термоса позянлуныс кӧ абу, ставсӧ позьӧ ньӧбны сэтысь: и пӧсь юанторсӧ, и шоныд пӧжасъяс, и шашлык. Доныс, дерт жӧ, студентъяслӧн столовӧйясысь ыджыдджык, но и абу ресторан ыджда (шуам, чай стӧканыс 30 шайта).

Тшай/копеысь мыйкӧ крепыдджыкӧс босьтны ог сӧветуйт: ӧти-кӧ, стадион вылын уна волонтер, судья, полицейскӧй, кодъяс сюся видзӧдӧны пӧрадок бӧрся, а мӧд-кӧ, татшӧм вермасьӧмъясыс тайӧ, кыдз тай шуӧны, праздник спорта, кытчӧ локталӧны и ичӧт кагаясӧн. А «спорт» да «градуса юанторъяс» гӧгӧрвоӧмъяс оз ёна лӧсявны ӧта-мӧдлы.

Дерт жӧ, мед абу кынмыны, колӧ унджык ветлавны. Абу бӧрйыны ӧти бура тыдалӧма точка да сэні вермасьӧмъяссӧбыд овны, а ветлавны и стадион пасьтала, и трасса гӧгӧр.

Видзӧдысьяслы оз позь петны заборитӧм трасса вылӧ – та бӧрся судьяяс да волонтеръяс тшӧтш сюся видзӧдӧны: ӧти-кӧ, тайӧ колӧ мед кок туйясӧн абу тшыкӧдны трассасӧ, а мӧд-кӧ, безопасность могысь.

Ветлыны татшӧм мероприятиеяс вылӧ бурджык абу ӧткӧн. Лӧсьыдджык, кор кодкӧкӧд позьӧ юксьыны эмоцияясӧн... Да и стадионті ветлавны гажаджык. 

Тан жӧ аслыд позьӧ иславны лызьӧн либӧ ватрушкӧн. А чӧскыд тшай кӧ на сьӧрад эм! Дзонь пикник артмас! 

Мунны Выльгортса стадионӧдз позьӧ кыдз ас транспортӧн (соревнование котыртысьяс вӧчӧмаӧсь ыджыд парковка – машина сувтӧдӧмын мытшӧд абу), сідз и автобусъясӧн: карсянь эмӧсь и торъя бесплатнӧй рейсъяс (петан кад да мунан туй индӧдъясыс эмӧсь Ӧтуввезйын), да и 101 да 174 номера автобусъяс мунӧны пӧшти стадионӧдзыс.

Болейтны вермасьӧм дырйи, чайта да, колӧ ставыс вӧсна. Видзӧдтӧг сы вылӧ Комиысь тайӧ ислалысьыс либӧ абу (висьтавлӧны ӧд, паныдав пӧ гӧстъяссӧ сідз, кыдз кӧсъян, мед паныдаласны тэнӧ йӧз муын), ыджыд кодзув нин тайӧ вермасьысьыс либӧ сӧмын на заводитӧ ассьыс туйсӧ, вермасьӧ медаль вӧсна либӧ кольӧма бӧрӧ. Бӧрӧ кольӧмаяслы поддержкаыс, гашкӧ, зэвджык на колӧ… Такӧд тшӧтш кӧсъя шуны (ог тӧд вермасьысьяслысь видзӧдлассӧ), Сыктывкарын зэв бура чолӧмалӧны ставсӧ: ставыслы горзӧны «давай-давай», пӧлялӧны торъя пӧлянъяссӧ, шенасьӧны дӧрапасъясӧн.

Награждение бӧрын ставыслӧн эм позянлун вӧчны фото спортсменъяскӧд, босьтны налысь кырымпас. Та боксянь найӧ зэв шыасьысьӧс, оз ӧткажитны болельщикъяслы.

Телевизорті видзӧдӧм бӧрын Елена Валерьевна Вяльбе кажитчис меным зэв стрӧг мортӧн, коді чорыда сулалӧ ас спортсменъяс дор. “Висьысьяскӧд” сійӧ вӧлі зэв шаньӧн. Быдӧнлы быттьӧ кӧсйӧ вӧлі мыйкӧ бурӧс шуны, шапкасӧ ли телефонсӧ ошкыштас.

Но, дерт жӧ, эм и “ложка дёгтя”. И сійӧ со мыйын. Мукӧддырйи меным оз ёна кажитчы видзӧдысьяслӧн реакция, кӧть и зэв бура гӧгӧрвоа, мый татшӧм болельщикъясыс эмӧсь не сӧмын тані. Шуам, талун 30 километра котӧртӧм бӧрын спортсменъяс вынтӧг куйлісны финиш вылын, тайӧ кадӧ трибуна вылын кодкӧ горӧдіс, мед вермасьысьяс телефон камера вылӧ “помашут ручкой”. Ог тӧд кылӧны-ӧ татшӧм горӧдӧмъяссӧ ислалысьяс, но мен тайӧ здукӧ лои  мыйлакӧ зэв яндзим (эг эськӧ ачым татшӧмсӧ шу да). Либӧ… кор вермасьысьяс ӧткажитчӧны фотографируйтчыны, кодкӧ вермас шуны, мый  Олимпиада бӧрын звезду пӧ поймал. А мортыс дистанция бӧрын сӧмын тэрмасьӧ шоныдінӧ.

фотоыс В. Муравьевалӧн

Мед кодӧскӧ гӧгӧрвоны ме век видла ачымӧс пуктыны сылӧн места вылӧ. И кӧсъя шуны, мый ӧдвакӧ ме турӧба кӧдзыд лунӧ 30 километра котӧртӧм бӧрын эськӧ верми на ставыскӧд фотографируйтчыны (кор на ставыс кӧсйӧны менӧ косявлыны ичӧт сувениръяс вылӧ 😃). Кӧть ачым и эг ветлы Олимпиада вылӧ да некутшӧм звезда «поймайтны» эг вермы.

Менам талунъя гижӧдӧ бара и лои медся радейтана тема вылӧ – спорт йылысь.

Спорт тема вылӧ тшӧкыда гижӧмысь кывлі нин вӧзйӧм лоны спортивнӧй блогйысьӧн да гижны рочӧн, мед эз сӧмын комияс менӧ гӧгӧрвоны. Ог тӧд, коркӧ, гашкӧ, и лоӧ переквалифицируйтчыны 😊.