Талун со кутшӧм мӧвпъяс бордъяснаныс вевттисны менӧ: мыйта кыв ме, вӧлӧмкӧ, велӧдлӧма олӧм чӧжнам! Думыштӧй асьныд! Коми, роч, английскӧй, древнерусскӧй, старославянскӧй, латина, фин, венгр!.. И ӧні лоӧ шогӧ усьны здук.. Коми да роч кывъяс кындзи сэсся некутшӧмӧн сёрнитнысӧ ог и куж. Мукӧд кывъясысь английскӧйнас делӧыс, гашкӧ, зэээв этша бурджык... да ешшӧ тайӧ гожӧм бӧрас бара фин кывнас неуна озырмышті.
А пані тайӧ сернисӧ со мыйла. Талун миянӧдз локтіс пӧсь гожся чолӧм: Сарансксянь, кӧні ми велӧдім фин кыв гожся курсъяс вылын, лэбовтіс небӧг сяма фотоальбом, кодъясӧс организаторъяс ыстӧмаӧсь быд участниклы. А радлуныс вӧлі! Турӧбасьысь Сыктывкарсянь быттьӧ бӧр сюри шондіа Мордовиялӧн юркарӧ.
 |
| фотоальбом фотоыс Ирина Гавриловналӧн :) |
Университетсянь июль тӧлысьын фин кывсӧ велӧдны ветлім куимӧн .
Тані зээээв дыр да зэв кузя позьӧ висьтавлыны сы йылысь, мый ми сэні вӧчим: кыдзи тӧдмасим, кыдзи велӧдчим, кыдзи гажӧдчим шойччан кадӧ. Но тайӧ ставсӧ кӧ гижны, мен, чайта да, ӧти рытыс оз тырмы, да и блогас сы мында шыпассӧ йӧзӧдны оз позь.
Саранск йылысь верма висьтавны, мый тайӧ фонтана кар, коді олӧ 2018-ӧд вося футбол кузя став мирса чемпионатӧн.
Велӧдчӧм йылысь гижа сӧмын сійӧс, мый тайӧ вӧлі, кыдз тай шуӧны, "полное погружение". 2 кывйӧн, кодъяс медтшӧкыда юргисны, вӧліны "kiitos" да "anteeksi" ("аттьӧ" да "прӧща кора"). Миян велӧдысьяс эз сернитны рочӧн. Век, кор мыйкӧ вӧлі гӧгӧрвотӧм (а тадзи пӧшти пыр вӧлі), ми лэптім ки, велӧдысьяслы шуим "anteeksi" и гӧгӧрвотӧмторсӧ видлім юавны фин кывйӧн. Фин кывнас кӧ эз артмы, видлім юавны английскӧйӧн. Английскӧйнас кӧ эз артмы (а тадзи вӧлі зэв тшӧкыда), заводитім шенасьны киясӧн - отсӧг вылӧ локтісны жестъяс 👋.
Тайӧ куим вежоннас ми тӧдмасим интереснӧй йӧзкӧд, сюрлім уна тешкодь ситуацияӧ.
Саранскӧ Йошкар-Олаысь вӧлі локтӧма нывка, коді нюмъёвтӧг миянлы висьтавліс, кыдз сылӧн "река уплыла в Татарстан" (Тайӧ аслас стӧч формулировка). Татшӧмторйыс збыль вӧлӧма: сылӧн сиктас юыслӧн ва кутӧгыс жугласьӧма да став ваыс ӧти войӧн мунӧма.
Либӧ... Америкаысь зон вӧлі локтӧма Саранскӧ мед велӧдны мокша кыв. Велӧдӧм кыв лыдыс сылӧн меысь ёна ыджыдджык, но сійӧ наӧн сёрнитӧ (на пиын весиг араб да эсперанто кывъяс!).
Сэсся помнита, кыдз ми первойысь вӧчим кытш колесо обозрения вылын (Мордовскӧй кӧлесаыс вель ыджыд вӧлі)! Кӧлеса кабинаӧ пуксьытӧдз миян нывъяскӧд вӧлі план (кыдз ми сёрӧнджык гӧгӧрвоим, планыс вӧлі наполеоновскӧй): медвылыс тшупӧдас ачпасасьны кар фон вылын. Дзӧрны ми заводитім, кор кыпӧдчим сӧмын 30 градус вылӧ на. Дзик вылас ми кутчысялім код кытчӧ вермис да видім ӧта-мӧднымӧс серӧктӧмысь: чайтсис, мый быд вӧрзьӧдчӧмысь кабинаным вермӧ пӧрны.
Водзынджык нин шулі тырвыйӧ "погружение" йылысь, и тайӧ "погружениеыс" петкӧдчис со кӧні. Миян нывка вузасянінын зукасьӧма кутшӧмкӧ нывбабакӧд, мый бӧрын нывбабаыслы шуӧма "anteeksi".
Тайӧ кадӧ кык медшӧр фин кывйыс менам юрын ёна дзугсисны. Шуам, кафеын меным сетӧны шыд, а ме "kiitos" пыдди висьтала "anteeksi" (т.е. "аттьӧ" пыдди мыйыськӧ кора прӧща).
Но медся тешкодь лоӧмторйыс, менам чайтӧм серти, вӧлі ешшӧ ӧти нывкакӧд. Бӧръя собеседование вылын, кӧні ми велӧдысьяскӧд сернитім фин кывйӧн торъя тема вылӧ, вӧлі сетӧма юалӧм "Кутшӧм пемӧсӧн ті эськӧ кӧсйинныд лоны? Мыйла?". Миян ёртным мӧд ногӧн гӧгӧрвоӧма юалӧмсӧ. Сійӧ поймитӧма "кутшӧм пемӧс эм тіян гортаныд?". И зэв серьезнӧя вочавидзӧма: "мӧс" да муу-гыштӧма на. Велӧдысьлӧн синъясыс лоӧмаӧсь блюд ыдждаӧн. "Miksi?" (Мыйла?) - юалӧма сійӧ. Нывка кӧсйӧма шуны, мый мӧскыс йӧв сетӧ да та вӧсна. "Бур кӧть серникузясӧ тэчны эг куж да эг вочавидз та вылӧ", - сёрӧнджык сійӧ шуис.
Талун та вылын сэсся пукта чут, кӧть и гижнысӧ уна мый йылысь на позьӧ.
P.S.:. Сиа, мед юясныд тіянысь некор некытчӧ оз мунны!
