Татшӧм пӧсь кадӧ, гашкӧ, гижнысӧ колӧ футболын вермасьӧм йылысь, либӧ пенсия вылӧ петан арлыд ыдждӧдӧм йылысь, либӧ университет помалӧм бӧрын удж корсьӧм йылысь...Но сёрнитыштны ӧні мен мыйлакӧ лои окота челядь тема вылӧ (тані менам матыссаяс вермасны ыджыда лолыштны: татшӧм пыртӧдӧн ме некодӧс ог дасьты некутшӧм юӧр кежлӧ).
Мый ичӧт кагалӧн мӧвпалан ногыс - дзонь енкӧла, казявлі важӧн нин. Бара вои тайӧ мӧвпас кага видзыштӧм бӧрын. Ичӧт мортыслӧн збыль олӧмыс да небӧгысь мойдыс ӧти тшупӧд вылынӧсь, сійӧ оз куж мыйӧкӧ абу эскыны (мый тшӧкыда оз тырмы верстьӧ йӧзлы), сійӧ кылӧ шылад сэні, кӧн миян пель некутшӧм мич оз казяв. Кагаыс мӧвпалӧ правилӧяс, дорышъяс, мытшӧдъяс вылӧ видзӧдтӧг.
Шуам, некымын лун сайын кык арӧса (!) зонка другысь корис менӧ ... ворсны нардыӧн. Весиг яндзимӧйла пӧсялі: мый-мый, а нардыасьнытӧ ог куж. Мӧвпавны заводиті стереотипъяс туйӧд: босьті телефон, пыри ӧтуввезӧ, син пӧлӧн лыдди тайӧ ворсӧмыслысь правилӧяссӧ, ёнасӧ, дерт, эг гӧгӧрво, но, мися, разберитчам. Дӧска вылӧ шашкияссӧ заводиті тэчны сідз, кыдз серпасалӧма ӧтуввезас. Кагуклы татшӧм тэчан ногыс сьӧлӧм вылӧ эз во: сійӧ ставсӧ разӧдіс да кутіс петкӧдлыны мен тэчны шашкиясысь башняяс. Тадз сэсся и ворсім: ме тэчи дӧска вылас башняясӧ, а сійӧ найӧс разӧдіс.
А код эськӧ и шуис, мый нардынас колӧ ворсны сӧмын ӧтуввезысь серпасъяс серти? Код ворсан правилӧяссӧ думыштіс? Гашкӧ, нардыасьӧм подулас и эм ичӧт башняяссӧ тэчӧм/разӧдӧмыс, а сэсся шашкияссӧ юрлӧс улӧ дзебӧмыс?
 |
| серпасыс ӧтуввезысь |
