Ог тӧд кымынысь бӧръя лунъясас думыштлі сы йылысь, мый эськӧ и блогйысьыштны колӧ (а то дзикӧдз вунсяс, кыдз тайӧ вӧчсьӧ). Но век кыдзкӧ эг слӧймы. Ыджыд темаяс вылӧ гижны, чайта да, ме абу дась, а ичӧтъяс вылӧ вдохновение ли мый ли оз тырмы.
Шуӧны тай, он кӧ пӧ тӧд мый йылысь висьтавны - сёрнит поводдя йылысь. Со и ме тасянь заводита.
Таво тулысыс некыдз оз вермы локны миян муясӧдз (ӧні на некымын градус кӧдзыд да ывлаын лымъялӧ). Тӧд вылӧ кӧ уськӧдны литератураысь "психологизм" гӧгӧрвоӧм (мыйыс эськӧ войнад юрӧ оз и лок!) да такӧд тшӧтш казьтыштны, мый психологизмыс вермас пейзаж пыр петкӧдчыны (весьшӧрӧ а мый 4 восӧ велӧдчи?), позьӧ шуны, тайӧ кузь тулысыс индӧ менам психологизм вылӧ. Тулысыс быттьӧ нюжмӧдӧ гожӧмлысь воӧмсӧ, а сідзкӧ, нюжмӧдӧ диплом дорйӧмсӧ да дона йӧзкӧд янсӧдчӧмсӧ.
Со, некымын лун сайын коли менам олӧмын коймӧд "последний звонок". Ӧні - университетысь нин. Ас группакӧд бӧръяысь петкӧдчим концерт вылын. (Мый эськӧ вермасны вӧчны филологъяс сцена вылын? Дерт жӧ, йӧктыны!)
И мыйлакӧ ӧні абу окота мӧвпавны, мыйкӧ гижны, дасьтыны диплом. Окота сӧмын лолавны тайӧ каднас, видзӧдны ёртъяс вылӧ да видлыны босьтны паметьӧ ставсӧ, мый накӧд йитчӧма: видзӧдласъяссӧ, шенасьӧмъяссӧ, серам шыяссӧ. Ӧд код тӧдас, кытчӧ разалам, кытчӧ нуас миянӧс тайӧ гожӧмыс.
А ӧні окота сӧмын лолавны некыдз абу вермысь локны тулыс дукнас да эскыны, мый гожӧмӧдзыс абу на ёна матын.
