Кӧні пӧсьджык пывсян

Некымынысь нин тӧдсаяс юалісны, мыйла татшӧм зіля блог нуӧдны заводитӧм бӧрын ме кытчӧкӧ воши. Некутшӧм гусятор тан абу. Сессия. Весиг юрӧс гыжйыштны некор.

И со… Экзаменъяс колины  мыш сайӧ. Сідзкӧ, и блогйысьыштны позьӧ.

Гортӧ локтігӧн кыйи мӧвп, мый бӧръя кадӧ туйыс менам гортсянь Сыктывкарӧдз лои уна кокниджык: ӧні юркарӧдз позьӧ машинаӧн некымын часӧн жургысьны. Татшӧмыс эз на вӧв ёна паськалӧма, кор ме сӧмын на заводиті университетын велӧдчыны. Поезда туй босьтіс дзонь лун.

Ӧтар боксянь кӧ видзӧдлыны, поездас, чайта да, романтикаыс унджык. Торъя нин войнас: пемыд вагон, пельын ворсӧ музыка, ӧшинь сайын гежӧда югнитласны бияс. Но, мӧдарсянь, поезда туйын ыджыд ин босьтӧны тшӧтш мунысьяс (соседъяс).

Овлывліс, мый мунан войбыд бӧрдысь кагакӧд либӧ код юра йӧзкӧд орччӧн (бур, мый такӧд ӧні стрӧгджык лои). Мукӧд суседъяссянь вӧлі став туй чӧжыс ӧти кывсӧ он кыв, а мукӧдлысь мӧдарӧ – ордпусӧ сизимӧд кӧленаӧдз велӧдан. Коркӧ ӧти пӧч аскӧдыс вӧлі став рӧдвужыслысь фотояссӧ сьӧрас босьтӧма! Рыт сёрӧдз ковмис серпасъяссӧ видзӧдны.

Торъя йӧз, кор аддзӧны менам киысь небӧг, панӧны “интеллектуальнӧй” сёрни литература йылысь (колӧ шуны, мый «интеллектуальнӧй» кывйыс зэв гежӧда кавычкитӧм).

Мукӧдъяскӧд сӧмын тӧдмасян нимъясӧн да станцияӧн, да петігӧн бара став бурсӧ сиан. Поездын пӧчьяс век кӧсйӧны менӧ вердны, верднысӧ кӧ оз артмы – юктӧдны тшайӧн. (Мыйла тадзи? Ог вермы шуны, мый ме сёйлытӧм морт кодь). 
А овлӧны сэтшӧм тшӧтш мунысьяс, кодъяс серти карӧдз локтӧдз окота поездысь чеччыны: тайӧ йӧзыс заводитӧны асланыс юалӧмъясӧн ку да гыж улӧ пырны. Юасьӧны сэтшӧмторъяс, мый йылысь эськӧ ачым ог пыр лысьт думыштны.

А неважӧн со мый казялі. Дурысь челядьӧс мам повзьӧдіс сійӧн, мый тётя пондас пинясьны… да индіс ме вылӧ. Тайӧ здукнас бӧрддзыны окота лои менӧ «тётяӧн» шуӧмысь. Мися, неважӧн на мамъяс кагалы киӧ пуктісны кампет да тшӧктісны нывкасӧ (менӧ) гӧститӧдны. А ӧні мый? Тётя!

Мукӧддырйи веськалас зэв интереснӧй морт, кодкӧд сернитігӧн войсӧ он казяв. Овлӧ, мый поездын тӧдмасьӧм петӧ поезд выйтысь. 8 во сайын лунвылӧ мунігӧн тӧдмаси Саранскысь нывкакӧд.  Туй помлань сетім ӧта-мӧдлы инпасъяснымӧс,  сэсся кутшӧмкӧ кад письмӧасим сыкӧд, а ӧні и Ӧтуввезын гижасьлам.

Менам нин тані дзонь туялӧм лои, кодӧс эськӧ нимтыны позис «Россияса поездъясын тшӧтш мунысьяслӧн психология сикасъяс» 😂.

Туйын век жӧ кадсӧ кыдзкӧ коллялан: лыддьысян либӧ музыка кывзан, либӧ ешшӧ мыйкӧ вӧчан. Помнита, коркӧ лыддьысигӧн туйвывса пасъяс вылӧ видзӧдтӧг ас пытшкын гӧгӧрвои, мый ме ас му вылын нин. Сэсся индӧдъяс серти аддзи, мый ми, збыль, Изьва районынӧсь. Сэки орччӧді ачымӧс пемӧскӧд, код кылӧ ассьыс территориясӧ.

 Кык первӧй велӧдчан вонас поездӧн ветлывлі зэв тшӧкыда. Коркӧ квайт часын мӧвп на эз вӧв гортӧ мунны, а кӧкъямысын поездын нин пукалі. Ас муыд век жӧ кыскӧ! Юртӧ  инӧ пуктыны, мӧвпъясын пелькӧдчыны гортын бурджыка артмӧ. Да и пывсяныс тані быттьӧ пӧсьджык.

P.S. Чужанін йылысь кӧ сёрниыс пансис... Тайӧ строчкаясыс волісны юрӧ 2017-ӧд вося Луд праздник водзын.

                Изьвалы

Быд мортлы аслас чужан муыс дона,
Менам Чужанінӧ – Изьва му.
Изьва мулӧн озырлуныс уна -
Гоз-мӧд кывйӧн ставсӧ он и шу.

Изьва – тайӧ тӧвся югыд востым,
Кӧр видзысьлӧн нэмся оласног,
Сарапанлӧн уна рӧмӧн ӧзйӧм,
Мездӧм аддзӧм доймӧм самолет.

Но кӧдзыд мулӧн пым сьӧлӧма быдтас,
Бура тӧдӧ татӧн чужӧм ёрт,
Мый Чужанінлы меддонаӧн лоас
Ачыс. Озырлуныс – морт.

Ме ог тӧд, кытчӧ менӧ нуас олӧм
Да кутшӧм юысь кыя ассьум шуд,
Но кор ме ай-мам муысь ёна ылын
Сэк лолӧй менам – абу менам – мӧд.