Кыдз эськӧ казьтылӧмъясыс и локтӧны
морт юрӧ? Тӧдса шылад кылӧм бӧрын ли, важся фото аддзӧм бӧрын ли… А, гашкӧ, кутшӧмкӧ
сёрни бӧрын.
Менам челядьдырӧй уси тӧд вылӧ пошта
кудйысь «Би кинь» журнал кыскӧм бӧрын.
Кыдз и важӧн (кӧть «важӧн»
гӧгӧрвоӧмыс и относительнӧй) медводз исалі журналсӧ: ок и чӧскыд типография
дукыс! Лолав да лолав!.. Выль петасӧн тӧдмасьӧмсӧ век заводитлі бӧръя
листбокъяссянь, кӧні вӧлі йӧзӧдӧмаӧсь кроссвордъяс да мукӧд ворсӧмъяс. Лӧз пастаӧн
гижи, мый ачым тӧді, а кор мыйкӧ эг тӧд – ыджыдъяслысь отсӧг кори. Лыддьысьны заводиті
сӧмын ставсӧ тӧдмалӧм да ставӧн ворсыштӧм бӧрын.
Но торъя шудыс вӧлі сэк, кор журналын
йӧзӧдасны на выль во кежлӧ календар да велӧдчан во кежлӧ урокъяс расписание. Помнита,
кыдз календарсӧ торйӧда журналысь, сэсся босьта мича рӧмъяса ручкаяс да сэні
пасъяла ассьым, бать-мамлысь, пӧль-пӧчлысь, ёртъяслысь чужан лунъяснымӧс. Колана
кадпассӧ босьта кытшӧ да вылас ичӧт шыпасъясӧн гижа кодлӧн тайӧ нимлуныс. Сэсся ляска сійӧс стенӧ.
Ӧні тайӧ казьтылігӧн нюм петӧ.
Век ассьым нимӧс кӧсйи аддзыны
йӧзӧдӧмъяс пиын, но кыдзкӧ мыйкӧ эз и артмы.
Тайӧ вояснад «Би кинь»-ыд нӧшта на
югыд рӧма лоӧма! Кыдз и важӧн, татчӧ зільӧны мыйкӧ гижны да серпасавны челядь. Бӧръя
петасын «А мекӧд со мый вӧлі…» рубрикаын Изьвавом сиктысь челядь висьтавлӧны
накӧд тешкодь лоӧмторъяс йылысь. Кыдз и ассьыд челядьдыртӧ абу казьтыштны?
Тайӧ лоӧмторйыс мекӧд вӧлі школаӧ
пыртӧдз на. Тайӧ кадас медсясӧ ёртаси зонъяскӧд. Тшӧтш котралім, ветлалім
велосипедӧн, судзӧдім льӧм. И ӧти гожся лунӧ менам керка дорын ворсӧм бӧрын
зонъяс матыстчисны ме дорӧ ыджыд синъясӧн да шуисны, мый найӧ аддзӧмаӧсь…
бомба. Сэсся нуӧдісны менӧ бомбаыс дорӧ да индісны. Бать-мам удж вылынӧсь. Мый вӧчны?
Вӧзйи зонъяслы нуны бомбасӧ ылӧджык, но найӧ ӧткажитчисны да пышйисны
гортъясаныс. Бӧрдӧмыс менам вӧлі! Гортӧ пырны ог лысьт – бомбаыс зэв матын
керкасянь, ылӧ мунны тшӧтш ог лысьт – бать-мамӧс удж вылысь виччыся, мед юӧртны
ӧпаснӧйтор йывсьыс. Пукси потш вылӧ да зэв шога ливза. Ог и помнит сэсся, коді
и локтіс отсӧг вылӧ: гортсаяс кодкӧ али соседъяс пиысь. «Бомбаыс» тайӧ вӧлӧма
важ видеокассеталӧн торйӧн. А радлуныс менам тайӧс тӧдмалӧм бӧрын вӧлі! Збыльысь, быттьӧ мӧд
чужан лун!
Тэрыба котӧрті нимкодьмӧдны тайӧ
юӧрӧн и ёртъясӧс. Но найӧ эз нимкодясьны мекӧд тшӧтш, найӧ сӧмын … сералыштісны
ме вылын! Вӧлӧмкӧ, найӧ тадз пӧръялӧмаӧсь менӧ и «бомба» йывсьысь водзсянь нин
ставсӧ тӧдӧмаӧсь! Висьтавлӧны, мый радейтчӧмсянь мустӧмтӧмӧдз ӧти воськов. Тайӧ
луннас ме тӧдмалі, мый радлунсянь дӧзмӧмӧдз воськовыс нӧшта на дженьыдджык! Ок и
дузгӧдчи ме на вылӧ, весиг ныкымын лун эг сёрнит да эг ёртась детинкаясыскӧд!
Сэсся тай бара кыдзкӧ водзӧ.
