Коймӧд лун кыдз ме заводиті нуӧдны блог. Активностьӧ эз на
чин.
Матыссаяс шуисны, мый блогӧс заводиті нуӧдны ыджыд
темаяссянь (коми кыв велӧдӧмсянь да весиг Олимпиадасянь), а ас йылысь нинӧм эг
и гиж.
Чайта, абу на кузь олантуйӧс абу интереснӧ серпасавны
«чужи-быдми-велӧдчи» принцип серти. Сійӧн думышті гижны ас йылысь 11
аслыспӧлӧстор, кодӧс тӧдӧны сӧмын матысса йӧз. Мыйла буретш 11, а абу, шуам, 10?
Тӧдмаланныд улысьджык.
1.Ичӧтдырйи ёна кӧсйи лоны милиционерӧн (сэки
полицейскӧйяс эз на вӧвны).
Милиционер уджын медся кажитчис форма новлӧм да
ставыслы эскӧданпас (удостоверение) петкӧдлӧм.
А 5-ӧд классын, кор заводитім велӧдны
география, мен окота лои велӧдчыны вулканологӧ. Мӧвпалі, кыдз кута ветлавны мир
пасьтала, туявны тайӧ биа гӧраяссӧ, а сэсся на йылысь вӧчны кинояс.
2. Ог вермы узьны транспортын. Тайӧ зэв ыджыд мытшӧд менам быдлаӧ ветлыны радейтӧмлӧн. Весиг поездын садьма быд 15 минут. Поездысь кӧ аддзанныд войбыд тшай да копе юысь нывкаӧс - 85 % , мый тайӧ ме.
Бурӧн завидьта налы, кодъяс туй заводитчигсянь туй помӧдз узьӧны топыд ныргорӧн.
3. Медрадейтан аканьӧйлӧн вӧлі француз ним – Жан
(ог и помнит, кыдзи тайӧ нимыс артмис). Сэсся чойлӧн быдмыштӧм бӧрын менам Жанӧ
лои сылӧн Жаннаӧн. Ме эськӧ видлі сувтны чойлы паныд: мися, Жаныс ӧд уна вося
ним нин. Но чой чорыда сулаліс аканьлӧн выль ним да гендернӧй статус вылас. Ковмис миритчыны.
4. Челядьдырйи больничаын куйлігӧн пошти наизусть
велӧдлі «Крошечка-Хаврошечка» мойд (мӧд небӧгыс сэсся сьӧрам эз вӧв).
Дядьӧй
шмонь пыр ӧні на тшӧктывлӧ тайӧ мойдсӧ юрысь висьтавны.
5. Школасянь на кажитчӧны нечетнӧй лыдпасъяс.
Торъя нин “121” лыдпас. Век радейті, кор алгебра урок вылын дискриминантыс
артмис 121. Тайӧ лыдпассьыс и квадрата вужйыс мичаа артавсьӧ.
6. Ӧти кадӧ ёна “виси” футбол видзӧдӧмӧн. Весиг
каньмӧлы нимсӧ пуктылі Аршавин!
7. Школаын велӧдчигӧн ёна кажитчис гижны радейтчӧм
йылысь висьтъяс.
Тайӧ висьтъяссӧ сетавлі лыддьыны аслам ёртъяслы. Медыджыд гижӧдыс
весиг 76 А4 лист бока вӧлі. Дышыс абу жӧ вӧлӧма!
8. Миян ёртъяскӧд эмӧсь чужан лунъя традицияяс.
Шуам,
ӧтияскӧд ми быд во ӧта-мӧдлы дасьтам кутшӧмкӧ электроннӧй козин (вӧчам фильм,
дасьтам ас анбур, лӧсьӧдам нимлунъя сайт, думыштам парольяс да с.в.), а мӧдлы
некымын во чӧж нин быд чужан лунӧ ме козьнала “мимоза” салат.
9. Юмовторъясысь медся ог радейт вафли (ог кут
гижны мыйла татшӧм нелюбовыс лои).
10. Ассьым сьылӧмӧс кутшӧмкӧ кад нин шуа авангардӧн.
Но весьтас кӧ
висьтавны, сьывны дзик ог куж. Кӧть и тайӧ кужтӧмлуныс эз торк менсьым Ижмаса «Foreign Song Festival» вылын петкӧдчӧмӧс.
(Тані Габова ёрт эськӧ шуис: «А коньӧрӧй да зрительӧй!») 🙉.
Фестиваль вылас
ёрткӧд сьылім Битлзлысь «Yesterday».
11. Бать-мам кывъяссянь, медводз анбур, кодӧс ме тӧдӧма,
вӧлӧма важся «аз, буки, веди, глаголь…» анбурыс. Таӧ менӧ прабаб велӧдлӧма.
Ачым эськӧ ог и помнит да.
Но тырмас. Кыдз и кӧсйыси, 11 факт ас йывсьым гижи, юксьышті аслам
тӧрӧканъясӧн. Дерт, тайӧ абу на ставыс.
П.С. Прамӧя кӧ шуны, юрам тӧрӧканыс вель уна (чайта, унджык
на студентъяслӧн ӧтуволанінса тӧрӧканъясысь). Но та йылысь сэсся, гашкӧ, коркӧ
мӧдысь нин.
